Mwanamke auawa kwa kuchomwa kisu tumboni

Gurian  Adolf

Katavi

Mwanamke  mmoja aliyejulikana kwa jina la  Vestina   Peter (27)  Mkazi wa Kijiji   cha Ilalangulu Tarafa ya Mpimbwe Wilaya ya Mlele  Mkoa wa Katavi  amekutwa akiwa ameuwawa  kikatili kwa kuchomwa  na Kisu  tumboni hadi kupoteza maisha.

 Kamanda wa Polisi wa Mkoa wa Katavi Dhahiri Kidavashari  ameviambia vyombo vya  habari kuwa tukio hilo la mauwaji ya kikatili limetokea  juzi majira ya saa kumi na mbili jioni.

 Amesema kabla ya tukio hilo marehemu aliaga nyumbani kwake alikokuwa akiishi na mumewe   kuwa anakwenda shambani kwake  kuvuna mahindi katika eneo la  Kazaroho.

Kidavashari ameeleza  baada ya marehemu  kuelekea  shambani hakuweza  kurudi nyumbani kwake kwa muda wa siku mbili  hadi  hapo  mwili wake ulipo onekana  ukiwa shambani kwake huku ukiwa  amechomwa  na visu tumboni hali iliyopelekea utumbo wake kutoka nje  na  akiwa na majeraha ya kuchomwa na vitu sehemu ya  kulia ya bega lake.

 Amesema  baada ya mwili wa marehemu huyo  kupatikani   taarifa zilitolewa kwenye kituo cha Polisi cha kibaoni, ambao walifika kwenye eneo hilo baada ya muda mfupi  na  chanzo cha mauwaji ya kikatili ya mwanamke huyo  bado hakifahamika.

Kamanda wa Polisi Kidavashari  ameeleza kuwa   mpaka sasa  jeshi la polisi    linawashikilia  watu wawili   kwa mahojiano zaidi,  ambao ni   Charles  Julio(42)  Mkazi wa Ilembo  na  Fred Ndaina (42) Mkazi wa Kijiji cha Ilalangulu Kata ya Kibaoni.

Aidha Amesema  watuhumiwa hao wanatarajiwa kufikishwa  mahakamani   mara baada ya uchunguzi  utakapo kuwa umekamilika ili kujibu tuhuma zinazo wakabili.