Atupwa jela miaka miwili wakati hayupo kizimbani

Na Israel Mwaisaka

Nkasi

MAHAKAMA ya hakimu mkazi wa wilaya ya Nkasi mkoani Rukwa imemuhukumu kifungo cha miaka miwili jela Augustino William mkazi wa kijiji cha kirando  baada ya kupatikana na kosa la kujiita meneja wa shirika la kuzalisha umeme(TANESCO) wilaya ya Nkasi na kujipatia fedha kwa njia ya udanganyifu  kutoka kwa wakazi wa kijiji cha Kirando kinyume cha sheria.

Hukumu hiyo ilimetolewa na hakimu mkazi wa wilaya ya Nkasi  Lilian Lutehangwa baada ya kusikiliza shauri hilo kwa ushahidi wa upande mmoja na kuridhishwa pasi na shaka yoyote kuwa  mtuhumiwa Augustino William alitenda kosa kwa makusudi  na kutoa hukumu hiyo kwa kuzingatia kifungu cha adhabu cha 35 cha kanuni ya adhabu na kumuhukumu  kifungo cha miaka miwili jela  ili kutoa fundisho kwa wenye tabia ya namna hiyo na kuwa kifungo kitaanza atakapopatikana kwani mtuhumiwa hakuwepo mahakamani hapo kwa taarifa kuwa aliruka dhamana.

Afisa Usalama wa TANESCO mkoa wa Rukwa, Wilbroad Ndunguru  ameelezea kuridhishwa kwake na hukumu hiyo kwani kumekuwa na wimbi kubwa la vishoka ambao wamekuwa wakiwatapeli wananchi wengi hasa maeneo ya vijijini na kuwalipisha pesa kinyume cha utaratibuwa TANESCO.

Ndunguru amesema katika mkoa wa Rukwa shirika limekuwa likipokea malalamiko mengi kutoka kwa wateja wake ambapo tayari wameshaanza kuwafikisha mahakamani wanaobainika kuwarubuni wananchi kuwa wao ni wafanyakazi wa shirika hilo ili kuondoa kabisa vishoka katika mkoa wa Rukwa.

Baadhi ya wananchi waliokuwepo katika eneo la mahakama wameeleza kuridhishwa na hukumu hiyo wengine wakiomba adhabu iongezwe kutokana na kitendo cha kuwatapeli wananchi wanaojitahidi kujikwamua kutokana na lindi la umasikini lakini wachache wanapita katika maeneo yao na kuwarubuni kuwa ni wafanyakazi wa TANESCO kwa ahadi ya kuwapatia huduma ya umeme.

Mwisho