Watoto wakike wajengewa uwezo

Na Gurian Adolf

Sumbawanga

WATOTO wa kike mkoani Rukwa wamepewa mafunzo  maalumu ya namna ya kuzitambua changamoto mbalimbali zinazowakwamisha  kuzitumia fursa zilizopo katika  kutekeleza matarajio yao ili waweze kujitegemea.

Akizungumza katika uzinduzi wa mradi uitwao U-report unaotekelezwa na Tanzania Girl Guides Association mkufunzi wa mradi huo Emiliana Stanslaus alisema wahitimu wapatao 20 katika kila  halmashauri wamewezeshwa namna ya kuwasaidia wasichana wenzao katika  kukabiliana na vitendo vya ukatili dhidi yao.

Alisema  wasichana hao walipata mafunzo ya siku mbili ambapo watawasaidia  wanafunzi wenzao wa kike katika shule za msingi na sekondari na wasichana waliopo vijijini katika kukabiliana na changamoto mbalimbali katika maisha yao ikiwa ni pamoja na kubakwa na pia kupata mimba za utotoni.

Emiliana alisema  mradi huo utatekelezwa katika halmashauri za Sumbawanga  vijijini, Kalambo Nkasi na Sumbawanga Manispaa kwa njia ya kutuma ujumbe wa maandishi ya simu kwenda namba maalumu ya 15070 kwa mitandao yote na kuwawezesha walengwa kutoa taarifa kwenye vyombo na mamlaka zinazohusika  dhidi ya vitendo vya ukatili walivyofanyiwa wasichana hao.

Alisema Tanzania Girl Guides Association kwa kushirikiana na Shirika la Umoja wa Mataifa linalo shughurika na watoto ulimwenguni UNICEF- itatoa mafunzo kwa wasichana zaidi ya 15 elfu watakaosaidia kuwaelimisha wenzao katika mikoa ya hapa nchini namna ya kukabiliana na vitendo vya ukatili.

Naye Honorotha Wamai ambaye ni mkufunzi wa Girl Guides mkoa wa Rukwa alisema wasichana hao waliohitimu watakiwa kutoa mafunzo yanayohusu mradi huo katika halmasahuri zao za wilaya kwa kushirikiana na idara za elimu na maendeleo ya jamiii.

Awali akizindua mradi huo kwa niaba ya katibu tawala mkoa wa Rukwa mkurugenzi mtendaji wa halmashauri ya wilaya ya Sumbawanga John Msemakweli alisema  serikali imetunga sheria zinazowalinda wasichana dhidi ya vitendo vya ukatili.

Alisema katika utekelezaji wa sheria hizo serikali mkoani Rukwa itawafikisha mahakamani  wazazi ambao watoto wao wanapata ujauzito pindi itakapo bainika kuwa  wameshiriki  kuficha ukweli au vielelezo vitakavyosaidia kuwatia hatiani watuhumiwa wa kuwapa mimba mwanafunzi.

Mwisho