Tutatenda dhambi kama wajukuu wetu wakilipa mikopo ambayo haijatunufaisha

Na Gurian  Adolf
Sumbawanga

WAKULIMA wilayani Sumbawanga mkoani Rukwa wameshauriwa kuhudhuria mafunzo yanayotolewa na tasisi zinazotoa elimu wilayani humo kwani fedha zinazotolewa kwaajili ya mafunzo hayo nyingine ni mikopo ambayo serikali inakopeshwa na italipwa na wajukuu wao na wasipo hudhuria na kuelewa  vizuri watakuwa wanatenda  dhambi ya kuwasababisha wajukuu zao kuja kulipa mikopo ambayo haikuwanufaisha babu zao.

Hayo yameelezwa na Gibson Haonga meneja mradi wa MIVARF taasisi ambao inaipa fedha  tasisi ya BRENT iliyopo wilayani Sumbawanga ambayo inatoa  elimu ya kilimo cha kisasa cha mpunga ili wakulima wa mpunga waweze kulima kisasa na hatimaye wapate tija. 

 Moja ya shamba darasa la mpunga ilililosimamiwa na tasisi ya Brent ambayo ni mbegu aina ya SARO 5 TXD-306 lililopo katika kijiji cha Milepa wilayani Sumbawanga.

Alisema kuwa mradi wao unapata mikopo kutoka mashirika ya IFAD na Benki  ya Afrika (ADB) ambazo  zinatumika kutoa elimu kwa wakulima wa mpunga wilayani humo lakini wapo baadhi ya wakulima wamekuwa wakitegea kuhudhuria mafunzo hayo hali ambayo ni kusababisha hasara kwani mikopo hiyo italipwa hata kama ni baada ya miaka 40 ijayo na wajukuu wao hivyo ni dhambi kuwafanya walipe mikopo ambayo haikuwanufaisha babu zao.

Haonga alisema kuwa ni suala la  aibu kuona wakulima wanabembelezwa kupata elimu wakati ni kwa faida yao  kwani atakae nufaika na mazao hayo ni mkulima mwenyewe hivyo kupiga chenga kuhudhuria mafunzo ni kitendo kibaya kwani wanajikomoa wenyewe na wajukuu wao.

Alisema kuwa Tasisi ya MIVARF imepata fedha hizo ambazo zitalipwa baada ya miaka mingi sasa kunahatari kubwa  huenda lengo lisifikiwe kutokana na wakulima kutotaka kushiriki kikamilifu katika mafunzo ya nadharia na vitendo na hivyo kuendelea kuwaacha wakulima hao wakibaki ni masikini kwakuwa elimu waliyopewa haikuwakomboa. 

Baadhi ya wakulima wanaopata mafunzo kupitia tasisi ya Brent wakiwa wanavuka mto kwaajili ya kwenda kwenye mafunzo katika shamba darasa lililopo katika kijiji cha Milepa wilayani Sumbawanga

Awali afisa ufundi na elimu wa tasisi ya BRENT inayopokea fedha kutoka katika mradi wa MIVARF kwaajili ya kuwajengea uwezo wakulima wa mpunga kwa njia ya mafunzo wilayani humo Faustina Kalyalya akizungumza katika shamba darasa lililopo katika kijiji cha Milepa wilayani humo ambapo walikuwa wakiadhimisha siku ya mkulima wa zao la mpunga alisema kuwa tasisi hiyo ilianzishwa wilayani humo zaidi ya miaka mitano ililiyopita ikiwa  na lengo la  kutoa elimu kwa wakulima katika suala zima la  kilimo bora sambamba na kuongeza  thamani katika mazao yao.

Alisema lengo la tasisi hiyo ni kutoa elimu kwa njia ya nadharia na vitendo kwa wakulima ili wakulima wa mpunga waweze kupata tija kwa kulima kisasa na kuacha kulima kilimo cha kizamani bila kufuata  taratibu  za kilimo bora hali ambayo inawasababisha  kupata tija na kuupiga teke umasikini kutokana na elimu ambayo wataipata.

Baadhi ya wakulima wa mpunga wakiwa wamekaa wakimsikiliza kwa makini mkufunzi wakati wanapatiwa mafunzo ya namna bora ya kulima mpunga kisasa ili wapate tija.

Kalyalya alisema kuwa lengo kubwa la  kutoa elimu kwa wakulima hao ni kuona wanafanikiwa ambapo ni matarajio ya tasisi hiyo kuwa kila mkulima aweze kuvuna kwa kiwango cha gunia 40 za mpunga kwa hekari moja hali ambayo itawawezesha kuona faida katika kilimo wanacholima.

Alisema iwapo wakulima watafuata utaratibu za kilimo na kufuata maelekezo ya wakulima hakuna muujiza kuwa watabadirisha maisha yao kutokana na tija  watakazopata kutokana na kilimo cha mpunga ambacho ni ndicho kinachotegemewa katika bonde la  ziwa Rukwa.

Naye Afisa kilimo wa Wilaya ya Sumbawanga Habona Kwileluya alisema kuwa iwapo wakulima hao wakitumia mbegu ya mpunga aina  ya SARO 5 TXD-306 ambayo inaonekana kufanya vizuri katika bonde  hilo watanufaika vizuri kwani asilimia kubwa ya wakazi wa bonde  hilo ni wakulima wa mahindi pamoja na mpunga.

Baadhi ya wakulima wanaopata mafunzo kupitia tasisi ya Brent wakimsikiliza afisa kilimo wa wilaya ya Sumbawanga vijijini Habona Kyileluya

 

Alisema kuwa nivizuri wakulima wakafuata maelekezo ya wataalamu wa kilimo waliopo katika maeneo yao ikiwa  ni pamoja na kulima  kwa wakati na matumizi ya pembejeo za kilimo tofauti na hivyo wasitegemee muujiza wa kupata mafanikio katika kilimo.

Mmoja wa wakulima anayepata mafunzo yanayotolewa na tasisi ya Brent, Isaya Katepa alisema kuwa tatizo lililopo hususani katika mafunzo kwa vitendo ni wakulima kutotaka kwenda kushiriki katika shughuli za mashamba darasa wakigomea wakidai kuwa wao wanalima mashamba yao binafsi kwahiyo hawana muda wa kwenda kulima katika mashamba darasa ambayo yameandaliwa kwaajili ya mafunzo.

Katika msimu wa kilimo unaoisha hivi sasa tasisi ya Brent imeanzisha mashamba darasa katika vijiji  vya Ng'ongo, Kaoze, Ilemba, Sakalilo na Milepa pamoja na kwa vikundi vya wakulima vilivyopo katika bonde  la  ziwa Rukwa ambayo wamekuwa ni mfano kwa wakulima hao ili waweze kujifunza kilimo cha kisasa cha mpunga.

Mwisho.