Majambazi wanne wauawa kwa risasi

Na Walter Mguluchuma

Katavi

Jeshi  la  Polisi Mkoa  wa  Katavi   limewaua majambazi wanne  wakiwa na  Bunduki  mbili za  kivita  zikiwa na  risasi  27 baada ya  majibizano ya  risasi na  Polisi   yaliyochukua  muda wa  dakika  kumi  na  tano.

Kaimu  Kamanda wa  Polisi wa  Mkoa wa  Katavi  Benedictor  Mapujila  alisema kuwa tukio hilo lilitokea   majira  ya  saa tano  usiku  katika  eneo  la   Kahenze  Kata ya Ugala  Tarafa ya  Nsimbo  Wilaya ya   Mpanda   Mkoani Katavi.

Alisema  kuwa siku moja  kabla ya  kuuawa kwa  majambazi hayo  majambazi yalimpora  mtu  mmoja  aliyefahamika  kwa  jina   Shija  Masanja  ambae   alikuwa ni   mfanyabiashara  walimvamia  huku wakiwa na  silaha   na  waliweza  kumpora  simu   mbili  aina  ya   TECNO  na pesa  tasilimu  Tshs  800,000 na  kisha kutokomea  kusiko julikana.

Kaimu  Kamanda   Mapujila   alisema  jeshi  la  polisi  lilipata  taarifa  za  tukio  hilo  na  ndipo  walipoanza  msako   mkali  wa  kuwasaka  majambazi  hao  katika  maeneo ya  Kata  nzima  ya  Ugala.

Alisema  katika  msako  huo  Polisi  waliweza  kuwaona   majambazi  hao wakiwa  wamejificha  kichakani  kando ya  barabara  na  baada ya kuona  wanafuatwa  na   askari  majambazi  hao walianza  kuwafyatulia  risasi  askari  polisi  huku wakikimbia  wakielekea  kichakani.

Katika   majibizano  hayo ya  risasi  yaliodumu kwa muda wa   dakika  15 polisi  walifanikiwa  kuwaua  majambazi  wanne  na  kuwakuta wakiwa  na  silaha   mbili Bunduki za   kivita   aina  ya  SMG  zenye  Namba  za usajili UA 5538 1997 ikiwa  na  risasi 14  kwenye  magazine  na   nyingine   yenye  namba AFV 0826 1996  ikiwa  na   risasi 13  kwenye  magazine.

Mapujila  alisema   majina  ya  majambazi  hao  yamehifadhiwa  kwa  sababu za   kiupelelezi  na  miili  ya   marehemu  hao  imehifadhiwa  katika  chumba   cha  kuhifadhi  maiti  katika  Hospitali ya  Manispaa ya  Mpanda.

Kaimu  Kamanda    ametoa  wito  kwa   wananchi  wale  wanaomiliki  silaha   kinyume   na  utaratibu kuzisalimisha   silaha  hizo  mara  moja  kwani  Jeshi  la  polisi   halitasita   kumchukulia   hatua mtu   yeyote  atakae   bainika  kumiliki  silaha  kinyume  cha  sheria.

Mwisho