Wavuvi watano wafa maji ziwa Rukwa

Na Gurian  Adolf

Sumbawanga

 

WATU watano wamekufa  maji katika ziwa Rukwa lililopo mkoani Rukwa wakati wakiwa katika shughuli za uvuvi katika ziwa hilo.

 

Tukio hilo lilitokea April 30 wakati watu hao wakiwa katika shughuli zao za uvuvi katika ziwa hilo.

Akitoa  taarifa ya tukio hilo kaimu kamanda wa polisi mkoa wa Rukwa Polycarp Urio alisema kuwa watu hao walikuwa wakifanya shughuli za uvuvi katika ziwa hilo.

Urio alisema kuwa wavuvi walio kufa  maji ni wakazi wa kijiji cha Ilanga, kata ya Muze, tarafa ya Mtowisa, wilaya ya Sumbawanga, Mkoani humo.

Aliwataja wavuvi hao kuwa ni Paschal Kipeza(30),Peter William(45), Edward Emily(40),Frank Kadima(36) Pamoja na Saliboko Damasi(28) wote hao wanasadikika kufa  maji baada ya boti walilokuwa wakifanyia uvuvi kuzama.

Kaimu kamanda huyo alisema kuwa sababu ya kuzama kwa mtumbwi huo kulitokana na Mtumbwi huo kukumbwa na dhoruba ya upepo mkali na kusababisha kuzama.

Aidha katika tukio hilo mvuvi mmoja aitwaye Florence Mpomwa(27)alinusurika kufa baada ya kujiokoa kwa kutumia dumu la maji ambalo lilimsaidia kuelea hadi kufika nchi kavu na kuokolewa na wavuvi wengine.

Hata hivyo alisema kuwa miili ya marehemu hao imekabidhiwa kwa ndugu zao kwa ajili ya mazishi.

Kaimu Kamanda Urio alitoa wito kwa wananchi hasa wavuvi kuwa makini wanapokuwa katika shughuli zao za uvivu hasa katika kipindi hiki cha masika.

Aliongeza kwa kutoa ushauri kwa wavuvi wote waachane na uvivu haramu kwani ni kinyume cha sheria za nchi na endapo watabainika hatua kali za kisheria  zitachukuliwa dhidi yao.

Mwisho