Wana CCM washauriwa kutokuwa wanyonge ndani ya chama chao

Gurian  Adolf

Sumbawanga

Baadhi ya wanachama wa chama cha mapinduzi(CCM) ambao nafasi zao zimefutwa kutokana na maboresha yaliyofanyika na mkutano mkuu hivi karibuni wametakiwa kuacha kujiona wanyonge kwakua bado ni wanachama kamili na wanahadhi sawa na wanachama wengine.

Wito huo umetolewa jana na mjumbe wa kamati ya utekelezaji ya jumuia ya wazazi CCM mkoa wa Rukwa Ponsian Nyami wakati akiwasalimia wajumbe wa kikao maalumu cha kuzindua kamati ya kuchangia fedha kwaajili ya uchaguzi wa jumuia hiyo mkoani humo.

Alisema kuwa wapo baadhi ya wajumbe katika ngazi mbalimbali ambao nafasi walizokuwa nazo zilifutwa kufuatia maboresho ya chama hicho kuacha kujiona wanyonge na kuamini kuwa wao ni wana CCM wa zamani.

Nyami alisema kuwa kutokana na nafasi hizo kufutwa waliobakia wanaitwa wana CCM wa Magufuli hivyo kusababisha kuibuka kwa makundi mawili ambayo ni wana CCM wa mwenyekiti Magufuli na wanachama wa zamani.

Alisema kuwa wanachama wote ni wa CCM isipokuwa ni maboresho ambayo yamefanyika kutokana na wakati hivyo hakuna aliyebora zaidi ya mwingine ndani ya chama hicho.

Kwaupande wake mwenyekiti wa jumuia ya wazazi ya CCM mkoa wa Rukwa Rainer Lukara alisema kuwa wanachama watakao jitokeza kugombea nafasi mbalimbali katika jumuia hiyo wanapaswa kutambua kuwa rushwa ni adui wa haki na kamwe atakae toa rushwa hata vumiliwa.

Alisema kuwa jumuia ya wazazi ndiyo inajukumu la kukilea chama na jumuia zake hivyo ni vizuri uchaguzi wa jumuia wao uwe ni wa mfano kwani itakuwa ni fedheha iwapo uchaguzi wa jumuia hiyo utagubikwa na rushwa.

Lukara aliwasisitiza wajumbe wa jumuia hiyo kuhakikisha kuwa wanaongeza wanachama wa jumuia hiyo na chama kwa ujumla kwani hivi sasa watu waliowengi wanavutiwa na utendaji kazi wa mwenyekiti huyo hivyo watumie fursa hiyo kuongeza wanachama wa CCM pamoja na kuwarudisha wale waliokihama chama kabla ya uchaguzi mkuu uliopita.

Alitoa wito kwa wajumbe wa kamati ya uchangishaji fedha kwaajili ya uchaguzi kujituma kufanya hivyo kwa kupitia kwa wanachama na wadau mbalimbali ili suala la mgombea kufadhili uchaguzi peke yake na matokeo yake wajumbe kujiona ni lazima wamchague kwakuwa amefadhili mchakato mzima wa uchaguzi ndani ya chama na katika jumuia zake.

Mwisho