MAJAMBAZI YATEKA KIJIJI KWA BUNDUKI YA KIVITA.

WATU watano wanaosadikiwa  kuwa ni majambazi  wakiwa na silaha za moto aina ya SMG  wamevamia kijiji cha Katisunga  Wilaya ya Mlele Mkoani Katavi na kuwapora wananchi vitu mbalimbali vya thamani zikiwemo fedha taslimu Sh 740,000.

Kwa mujibu wa Kamanda wa polisi wa Mkoa wa Katavi, Dhahiri Kidavashari,  tukio hilo lilitokea  juzi saa 2:30 usiku katika kijiji hicho, ambapo majambazi hao ambao walikuwa na bunduki aina ya Smg walifika  kijijini hapo na kuwavamia wananchi wa kijiji hicho waliokuwa wafanyabiashara  wa vibanda vya kuuza vocha  na kutowa huduma ya Mpesa  baada ya kuwatisha kwa kufyatua risasi hewani.

Alisema kuwa baada majambazi waliendesha operesheni hiyo kwa takribani saa moja ambapo walifanikiwa kupora kiasi hicho cha fedha kutoka kwa watu waliokuwa wakitoa huduma ya M Pesa na kuchukua na simu tatu zenye thamani ya Sh 450,000.

Kwa mujibu wa Kamanda huyo wa polisi, mtu mmoja  aitwaye  Justine  Mkolwa 21  mkazi wa mtaa wa Makanyagio mjini Mpanda Dereva  wa gari  aina ya Totota  Hiluxe lenye namba za usajiri  T800 ARN amekamatwa na anahojiwa kuhusiana  na tukio hilo.

Hata hivyo polisi bado inaendelea na uchunguzi kuhusu ilikuwabaini wale wote waliohusika ili vyombo vya dola viweze kuwachukulia hatua za kisheria.