Radi yaua ng'ombe

Na Gurian Adolf

Nkasi

JUMLA ya ng'ombe kumi wamekufa baada ya kupigwa radi wakati wakiwa machungoni  huku mchunga ng'ombe  hao Ahmad Katunzi (15) akinusurika  kifo.

Kamanda wa Polisi wa mkoa wa Rukwa , George Kyando amethibitisha kutokea  kwa tukio hilo lililotokea  juzi majira ya saa 11 jioni katika kijiji cha China kilichopo  Kata ya Kate wilayani Nkasi .

Akisimulia mkasa huo mwenyekiti wa kijiji hicho , Joseph  Ndasi  ambaye pia ndiye  mwenye mifugo hiyo alisema jioni ya tukio hilo Ahmad alikuwa akichunga ng’ombe wapatao  22  ambapo  ghafla radi ilipiga  na kuua ng’ombe kumi papo hapo .

“Katika tukio hilo mchungaji Ahamd alijikuta kimerushwa  mita kumi hivi kutoka alipokuwa amesimama  ambapo amepata majeraha madogo madogo  … ngombe wengine kumi na mbili wamenusurika ila kwa hofu wote walikimbia na kurejea nyumbani “ alisema.

Hata hivyo kamanda wa polisi  mkoani humo aliwasihi wachungaji kurejea nyumbani mara moja pindi wanapoona dalili za mvua kwani ni hatari kwa maisha yao na wanyama hao.

Taarifa  kutoka kijijini zinakumbusha usemi wa wahenga usemao kufa kufaana kwani  wakazi kijiji hicho walivamia mizoga  ya wanayama hao na kuanza  kuagawana nyama kwaajili ya kitoweo.

Mwisho