Nusura asifanye mitihani

Na Israel Mwaisaka

Nkasi

MWANAFUNZI wa Darsa la Saba Mbalu Mihangwa (15) anayesoma Shule ya Msingi Miyombo  wilayani Nkasi mkoani Rukwa nusura asifanye mitihani ya kumaliza elimu ya msingi  baada ya wazazi wake  kumzuia  ili ashiriki msiba wa mdogo wake.

Mdogo wa mwanafunzi huyo , Keneja Madirisha (8) aliyekuwa akisoma darasa  la pili  katika shule hiyo alifariki dunia usiku wa kuamkia siku ambayo  wanafunzi wa darasa la saba nchi nzima walikuwa wakifanya mtihani wa kuhitimu elimu ya msingi 

Akisimulia mkasa huo Mwalimu mkuu wa shule hiyo Gwakisa Bisaya alisema kuwa wasimamizi wa mtihani huo  walibaini kuwa  Mwanafunzi mmoja hajahudhuria kwenye mtihani ndipo walipotoa taarifa kwenye uongozi wa shule na wao  walichukua hatua nakuanza kumfuatilia mtoto huyo  nyumbani kwao.

Alisema kuwa baada ya kufika nyumbani kwao wakiongozana na baadhi ya wasimamizi na askari Polisi walikuta msiba na baada ya mahojiano  Mwanafunzi huyo alisema kuwa alizuiwa na wazazi wake asiende kwenye mtihani  wa taifa ili aweze kushiriki katika msiba huo wa  mdogo wake.

Alidai kuwa waliamua kumchukua  Mwanafunzi huyo  na  kumpeleka darasani na kushiriki na wenzie kufanya mtihani huo na kuwa alifanikiwa kufanya mitihani ya juzi na jana aliendelea na mitihani hiyo ya taifa.

“tuliamua kumchukua Mwanafunzi huyo na kwa kuwa hilo lilibainika wakati wenzie wakiwa katika  somo la  kwanza katika mtihani huo alikimbizwa haraka kwenda kushiriki mtihani huo na kuenenda sambamba na wenzie” Alisema

Msimamizi wa mtihani huo Vitus Mwalongo alidai kuwa  kilichofanyika ilikua ni kutumia nguvu kumchukua Mwafunzi huyo na  baada ya kufanya mtihani  huo wa kwanza mtoto huyo alikabidhiwa kwa Mwalimu mkuu ili amuhifadhi asirudi nyumbani kwao ili aweze kushiriki katika siku ya pili ya mitihani hio ya taifa na hivyo kutorudi kwao. 

Akithibitisha kutokea kwa tukio hilo  Ofisa elimu taaluma wa wilaya ya Nkasi George Mwahinda alidai kuwa licha ya  mazingira hayo kutokea Wasimamizi wa kituo husika walichukua hatua za haraka na Mwanafunzi huyo amefanikiwa kufanya mtihani huo kwa uangalizi mkubwa na mtihani huo ukimalizika atarudishwa nyumbani kwao ili akahani msiba wa mdogo wake huyo. 

mwisho