Mzee wa baraza jela kwa rushwa

Na Walter Mguluchuma

Katavi

MAHAKAMA ya  Wilaya  ya  Mpanda  Mkoani Katavi  imemuhukumu  Mzee  wa  Baraza  la Mahakama ya  Mwanzo mjini  Mpanda Anna Mlugala (59) kutumikia kifungo  cha miaka   mitatu  jela   baada ya  kumtia hatiani kwakosa  la kupokea  Rushwa ya shilingi elfu 50 kutoka  kwa  mshitakiwa   ambaye alikuwa na  kesi kwenye  Mahakama hiyo.

Hukumu  hiyo  ilitolewa   jana na  Hakimu  Mkazi  mfawidhi wa  Mahakama ya  Wilaya ya  Mpanda  baada ya  kuridhika  na  ushahidi  uliotolewa Mahakamani  hapo na  upande wa   mashta   ulioongozwa  na   Mwendesha  mashtaka  wa TAKUKURU  wa  Mkoa   wa   Katavi   Simon Buchwa.

Awali   mwendesha  mashtaka wa  TAKUKURU  Simon Buchwa   alidai   mahakamani  hapo  kuwa   mshtakiwa Mlugala  alitenda  kosa  hilo mei  21  mwaka  2015  katika   eneo  la   Mtaa wa   Makanyagio  Manispaa ya   Mpanda.

Siku  hiyo mshtakiwa anadaiwa   kuomba  rushwa ya  shilingi elfu 50 kutoka   kwa   Noelia  Kakusu  ili  aweze kumsaidia katika  kesi yake aliyokuwa  ameshitakiwa katika  Mahakama hiyo akituhumiea kuharibu mali.

Mwendesha   mashitaka  Buchwa   alliambia   Mahakama  kuwa  mshitakiwa   alikamatwa   baada ya   Taasisi ya  kupambana  na  kuzuia  Rushwa  kupata  taarifa  za   mshitakiwa  kuomba  Rushwa kiasi  hicho cha  fedha.

  Alidai kuwa baada ya  TAKUKURU  kupata  taarifa  hizo  ndipo walipoandaa  mtego na kufanikiwa  kumkamata  Mzee huyo  wa baraza  akipokea  kiasi  hicho cha  fedha    katika  eneo  lilikuwa  jirani na Mahakama  hiyo.

Katika  utetezi wake  mshitakiwa  ambae  alikuwa na  mashahidi watatu   alidai kuwa   fedha walizomkamata  nazo  hakua  amepewa  kama   rushwa  bali   alikuwa   amepewa  ili   akamnunulie vifaa  vya kujifungula   Noelia   Kakusu  ambaye alikuwa ndiyo mshtakiwa aliyempa rushwa ambae pia  alikuwa ni   mjamzito.

Madai  hayo  yalipingwa na  mwendesha  mashitaka  wa  TAKUKURU   Buchwa  kwa  kile   alichoeleza  kuwa  kitendo cha  mshitakiwa Mlugala  kutoka  Mahakamani wakati   kesi   ikiwa  inaendelea na  kwenda nje ya  Mahakama  kuchukua  fedha    kwa  Noelia ni  ushahidi tosha  kuwa  mshitakiwa  huyo   alikuwa  amedhamilia  kuchukua  rushwa  hiyo  ambayo  alikamatwa  nayo kufuatia mtego uliowekwa na TAKUKURU.

Hakimu  Chiganga  Ntengwa baada ya kusikiliza  ushahidi uliotolewa   Mahakamani  hapo na  pande  hizo  zote mbili  ambapo  upande  wa  mashitaka ulikuwa na  mashahidi wanne na mshitakiwa watatu  aliiambia  Mahakama  kuwa  pasipo shaka  yoyote    mshitakiwa  amepatikana  na  hatia  ya kosa la kifungu cha  sheria  namba 15 ya kudhibiti  na kupambana  na  rushwa   namba   11 ya  mwaka  2007 na hivyo inamuhukumu kwenda jela miaka mitatu.

Hivyo  hakimu huyo alisema Mahakama  imeamua kumuhukumu mzee  huyo  wa baraza   kutumikia  kifungo  cha  miaka   mitatu  jela  au kulipa  faini  ya  shilingi laki  5, hadi  Mahakama  ilikuwa  imemaliza  kazi  zake  mshitakiwa   alikuwa  ameshindwa kulipa   faini  hiyo na hivyo kwenda jela.

Mwisho