Atakaye ugua kipindu pindu akapona kufikishwa mahakamani

Na Gurian Adolf

Sumbawanga

MKUU wa mkoa wa Rukwa Zelote Steven amewaonya wakazi waishio mwambao  mwa ziwa Tanganyika mkoani humo kuacha kukimbilia tiba  za jadi  pindi wauguapo badala yake waende hospitali ili waweze kutibiwa kitaalamu magonjwa mbalimbali ikiwemo ugonjwa wa kipindu  pindu  ulioibuka katika kijiji cha Samazi wilayani Kalambo mkoani humo.

Akizungumza na wakazi wa kijiji cha Samazi wilayani Kalambo mkoani humo Mkuu huyo wa mkoa alisema kuwa miongoni mwa changamoto zilizopo ni baadhi ya wakazi wa kijiji hicho kutowapeleka wagonjwa hospitali na kuwakimbizia kwa waganga wa jadi  hali inayosababisha kutopata matibabu sahihi.

Alisema kuwa matibabu yanayofanyika katika hospitali ni ya kitaalamu na yanafanyiwa tafiti na hufanyika bila kukisia tofauti na kwa waganga wa jadi ambao wamekuwa wakitoa tiba  zao kwa kukisia kwakua hawatumii vifaa ambavyo  vinauwezo wa kuona wadudu wanaosababisha ugonjwa husika.

Mkuu huyo wa mkoa alisema kuwa katika nchi hii mtu  akiugua kipindupindu na akitibiwa na kupona sheria inamtaka kufikishwa mahakamani kutokana na kitendo hicho cha kuugua ugonjwa huo kwani sababu kubwa ni kukiuka taratibu na sheria za usafi.

Alisema kuwa wale wote waliougua na kupona kipindupindu katika kijiji cha Samazi wajiandae wakati wowote serikali itakapoona inafaa inaweza kuwafikisha mahakamani kwakuwa sheria inaruhusu hilo.

"Wakazi wa kijiji cha Samazi mliougua kipindupindu na kupona kaeni chonjo,wakati wowote kuanzia  sasa mnaweza  kufikishwa mahakamani kutokana na kuugua kipindupindu kwakua sheria inataka  hivyo,na katika hili serikali ya mkoa haina mzaha kutokana na ninyi kutofuata taratibu za afya ikiwemo ni pamoja na kuchemsha maji  ya kunywa"..... Alisema 

Alisema kuwa ili kukabiliana na ugonjwa huo ni lazima kila mwana kijiji hicho afuate maelekezo ya wataalamu wa afya kwakua wapo na wanatoa elimu kila siku ili kukabiliana na ugonjwa huo ambao tayari umekwisha gharimu maisha ya mtu  mmoja.

Naye mganga Mkuu wa mkoa wa Rukwa Bonifasi Kasululu alisema kuwa mpaka kufikia Jana zaidi ya watu 20 wamekwisha ugua ugonjwa huo, na wataalamu wa afya wapo katika kijiji hicho kwaajili ya kutibu watu wanaougua na kutoa  elimu ni namna  gani ya kukabiliana na ugonjwa huo.

Alisema kuwa jitihada zinafanyika mpaka sasa ni mtoto mwenye miaka mitano  ndiyo aliyefariki dunia kwa ugonjwa huo lakini siyo sababu ya kubweteka na kuona sio tishio kwani uzembe ukifanyika unaweza kuua  watu wengi zaidi hivyo basi ni jukumu la  kila mtu  kuchukua tahadhari asiugue ugonjwa huo.

Kwa upande wake Lilian Sichilima mkazi wa kijiji hicho alisema kuwa changamoto kubwa inayowakabili ni kutokuwa na huduma ya maji  safi na salama,kwani wananchi wengi wa ziwani wanategemea maji  hayo kwa kila kitu, ikiwemo ni pamoja na kufua,kupika,kuogelea na baadhi yao hata kunywa bila kuyachemsha ndiyo sababu kubwa inayosababisha ugonjwa huo kuota  mizizi katika kijiji hicho.

Aliiomba serikali pamoja na kutoa elimu lakini pia suala muhimu ni kuwapelekea huduma za mabomba ili maji  watakayokuwa  wakitumia yawe tofauti na yale ya ziwani moja kwa moja na yatoke katika chanzo kingine na hata kama yakiwa ni ya ziwani basi yatengwe kutoka ziwani na kuwekwa kwenye eneo jingine na yawe yanatibiwa ili kuua vimelea vya maradhi yanayoweza kuwadhuru tofauti na hivyo ugonjwa huo utakua  unajirudia Mara kwa Mara.

Mwisho