Barabara za katavi zatengewa mabilioni

Na Walter Mguluchuma

Katavi

Zaidi ya shilingi bilioni 11 zimetengwa kwaajili ya kuboresha barabara katika Halmashauri ya Manispaa ya  Mpanda Mkoani Katavi.

fedha hizo ni mpango wa uboreshaji miundo mbinu  ya miji yaani ULGSP uliopangwa kutekelezwa kwa kipindi cha miaka mitano ambapo miradi saba imepangwa kutekelezwa katika halmashauri 18 hapa nchini. 

 Mkurugenzi wa halmashauri ya  Manispaa ya  Mpanda Enelia  Lutungulu amebainisha hayo  wakati wa   mkutano  wa wadau  wa  mpango  kabambe wa Master   plan ya miaka 20 ya Manispaa hiyo uliofanyika  katika  Ukumbi wa Manispaa ya Mpanda.

Alisema   mpango wa  uboreshaji wa   miundo mbinu katika  Halmashauri hiyo  ulianza  toka mwaka wa fedha wa  2013 na 2014 na  utakamilika mwaka wa fedha wa 2017 na2018.

Kwamujibu wa sensa ya watu na makazi ya mwaka 2012 Manispaa hiyo ilikuwa na jumla ya wakazi 102,900 hivyo kupelekea kwenye mpango huo kupata  mgao wa  Dola  za kimarekani 7,342,975, ambazo nisawa na shilingi za kitanzania 11,750,000,000 ambazo zitatumika kutekelezwa mpango huo kwa  muda wa miaka mitano.

Lutungulu  aliitaja  miradi saba iliyopangwa kutekelezwa  kwenye mradi huo kuwa ni usanifu wa miradi ya barabara na ujenzi wa  soko la kisasa katika Kata ya Kazima, ujenzi wa Stendi ya  mabasi ya  kisasa katika  eneo la  Ilembo, ujenzi wa barabara kwa kiwango cha  lami zenye urefu wa kilometa 7.7  Mpanda Mjini na uandaaji wa mpango  kabambe  wa  Manispaa ya  Mpanda na kujenga uwezo.

Mradi huo  utakekelezwa na  mtaalamu mshauri  City Plan Consultancy T Limeted kwa gharama ya shilingi za kitanzania 283 600,000  Fedha  ambazo zimetolewa na  Manispaa ya  Mpanda  kupitia  mpango wa utekelezaji wa  miji  unaofdhiliwa kwa  mkopo wa  Benki ya Dunia.

 Alifafanua kuwa mpango  kabambe Master Plan wa  Manispaa hiyo ulitangazwa kuanza mwaka  2010 lakini  ulisimamishwa kutokana  na kuongezeka kwa  maeneo ya utawala hivyo mpango huo unatangazwa upya.

Iddy  Mwerangi   Afisa  Mipango  miji  mshauri  wa  City  Plan   Consultancy  T   Limeted alisema kuwa ni lazima nguvu  ziunganishwe za wadau  mbalimbali wanaoweza  kusaidia  kupatikana  kwa taarifa  mbalimbali zitakazowezesha uaandaaji  wa  mpango Kabambe .

Alisisitiza  kuwa  swala  hilo  linahitaji kushirikisha  wananchi  kwani uzoefu  unaonesha  kuwa  maeneo  ambayo wananchi wamekuwa hawashirikishwi kumekuwa na migogoro.

Naye Makamu Meya wa Manispaa ya  Mpanda John   Matongo alisema swala  hilo   bila  ushirikiano wa  wananchi  haliwezi kufanikiwa  hivyo  wao  kama  madiwani  watahakikisha  zoezi  hilo la  mpango  Kabambe wa  Master   Plan  linafanikiwa.

Kwaupande wake mkuu  wa  mkoa  wa  Katavi   Meja  Jenerali   mstaafu   Raphael   Muhuga  alisema  kuwa  mji wa  Mpanda  unakuwa  kwa  hivyo ni vema  maeneo ya mji huo  yakawa  yamewekwa  kwenye  mpango  unaoeleka.

 Alisema kuwa  katika mpango huo  wahakikishe pia wanatenga  maeneo  kwaajiri ya  wakulima na  wafugaji kwani kwa  sasa  yapo  baadhi ya maeneo  watu  wanashindwa kulima  kutokana  na wafugaji kuvamia  maeneo ya wakulima.

Aliongeza kusema kuwa nchi  hii inaendeshwa  kwa  misingi ya sheria  na  hakuna   mtu aliyejuu ya sheria  hivyo  kwa mtu  yoyote   ambaye ataamua  kuishi kinyume  na  utaratibu wa matumizi bora ya  ardhi yalivyo pangwa ajue kuwa  hatua  lazima  zitachukuliwa  dhidi yake.

Mwisho