Watu wawili wasadikika kufa maji wakivua samaki

Na Gurian Adolf

Kalambo

WAVUVI wawili wakazi wa Kijiji cha Kilewani Tarafa ya Kasanga Wilaya ya Kalambo mkoani Rukwa, wamekufa maji baada ya kuzama kwenye Ziwa Tanganyika wakati wakivua samaki.

Tukio hilo lilitokea  julai 17 majira ya saa  8 za usiku baada ya wavuvi hao ambao ni marafiki walipoingia ziwani kwa lengo la  kufanya shughuli zao za uvuvi ambapo walikuwa wamejiajiri kupitia sekta ya uvuvi.

Wavuvi hao waliofahamika kwa majina ya Ezekiel Nkambula(30) na Hamphrey Simlinga(30) wote walikufa baada ya mtumbwi waliokuwa  wakiutumia  kuvulia samaki kupigwa  na dhoruba na kuzama. 

Ofisa  Tarafa ya Kasanga, Peter Mankambila, alisema jana kuwa watu hao ambao ni marafiki waliondoka kuelekea Ziwani wakiwa na mitumbwi kwa lengo la kuvua samaki, na siku hiyo kulikuwa na upepo mkali na mawimbi makubwa.

Alisema kuwa walipoingia ziwani nyakati za usiku hawakurudi  tena mpaka  baada ya siku mbili ndipo ndugu na jamaa waliamua kufuatilia kutaka kujua nini kiliwakuta ndugu zao hao ambao haikuwa kawaida yao kuto rejea  kijijini kwa muda mrefu licha ya kuwa walikuwa wamezoea kufanya shughuli hiyo ya uvuvi.

Alisema baada ya kufuatilia ndani ya maji kwa kuwatafuta kwa muda mrefu walifanikiwa kuona nguo wakizokuwa wamevaa zikielea kwenye maji ndipo walipo aminini kuwa watu hao wamekufa maji maana haiwezekani nguo walizokuwa wamevaa kuelea na wenyewe wakiwa wamebaki hai.

Baada ya kuzipata nguo hizo walirudi nazo kijijini kama ushuuda wa vifo vya watu hao na kulazimika kuweka msiba wakiamini kuwa ndugu zao walikuwa wamefariki dunia kwa kuzama  katika ziwa Tanganyika.

Alisema kufuatia hali hiyo, walitoa taarifa polisi kufuatia tukio hilo na kujiridhisha kuwa ndugu zao hao watakuwa  wamekufa  maji kwakua siku hiyo ziwani kulikuwa na upepo mkali na mawimbi makubwa.

Aidha, Mankambila alisema hata hivyo, miili ya marehemu hao bado haijapatikana huku viongozi wa serikali wa kijiji na tarafa wanaendelea na jitihada za kusaka miili ya watu hao.

Mankambila alitoa wito kwa wavuvi kuchukua tahadhari kwa kutokwenda kufanya shughuli za uvuvi pindi ziwa hilo linapokuwa na dhoroba na mawimbi kwani ni hatari  wanaweza kupoteza maisha kwa kuzama  majini  kutokana na dhoruba inayokuwa ndani ya ziwa hilo.

Mwisho