Wakulima Rukwa waililia Serikali

Na Gurian  Adolf

Sumbawanga

WAKULIMA mkoani Rukwa wameiomba serikali ianze mikakati ya kuwatafutia soko  la  uhakika la  mazao yao kutokana na mazao ya chakula kuzidi kuporomoka bei  baada ya mavuno kuongezeka katika maeneo mbalimbali hapa nchini.

Ombi hilo limetolewa kwa nyakati tofauti na wakulima wa mkoa  huo wakati wakizungumza na gazeti hili na kusema kuwa zao la  mahindi limeshuka bei  kwa kasi  kubwa kutoka shilingi 110,000 wiki mbili zilizopita hadi kufikia shilingi elfu 50,000 kwa kipimo cha gunia lenye uzito wa kilogramu  100 hivi sasa.

Wakizungumzia  kushuka huko kwa bei  wakulima hao wamesema kuwa kutokana na kushuka kwa kasi  kubwa kwa zao la  mahindi ambalo  ndiyo tegemeo kwa wakazi wa mkoa  huo ambapo zaidi ya asilimia 90 wamejiajiri katika kilimo hususani cha mahindi huenda wakaendelea  kuto  ona  tija wanayoipata kutokana na kushuka huko kwa bei  ya mahindi wakilinganisha na gharama za uzalishaji.

Mmoja wa wakulima hao Peter Kayanda alisema kuwa serikali haina budi kuwasaidia wakulima wa mkoa  huo kupata soko  la  uhakika kutokana na kuwazaia wasiuze nje ya nchi ambako  soko  lake huwa ni zuri  tofauti na kuuza humu nchini kwani bei  wanayouzia huwa haiwapi faida.

Alisema kuwa ni ukweli usiopingika kuwa kadiri siku zinavyozidi kuongezeka ndivyo  ambavyo  wakulima wanazidi kukata  tamaa ya kulima kutokana na kutoona  faida ya kilimo wanacholima na maisha yanazidi kuwa magumu kwao na mpaka hivi sasa waliobaki wanalima ni wazee lakini vijana wanaofikiri katika kupata faida kubwa wamekwisha acha siku nyingi kutokana na kutoona faida kwa kukosa soko. 

Naye  Maria Kalemela alisema kuwa kila siku zinavyoongezeka ndivyo  wakulima wanavyozidi kuwa na maisha magumu kutokana na kupanda  kwa bei  ya pembejeo, gharama za uzalishaji na ukosefu wa soko  la  mazao na hivyo hawaoni ahueni wanayopata katika kilimo na kujikuta wakikata tamaa kuendelea kulima.

Alisema kuwa licha ya kwamba serikali imekuwa  ikinunua mahindi kwa bei  ndogo  ya shilingi 500 kwa kilo lakini bado ni wakulima wachache ndio wanaouza na mahindi mengi wanabaki nayo  kwakua serikali haina uwezo wa kuyanunua yote na kuishia  kupika pombe kutokana na kukosa kwa kuyauza au kupecha ndani kutokana na kutokuwa na soko  la  uhakika hapa nchini.

Kalemela alisema kuwa wanaonufaika kwa kiasi kidogo ni wafanyabiashara  ambao wananunua mahindi yao kwa bei  ya kuwalalia tena kwa vipimo wanavyotaka wao na kujaza lumbesa na kutafuta soko na kuzidi kumkandamiza mkulima ambaye anazalisha kwa gharama kubwa na kuishia  kupata hasara.

Alisema kuwa huenda siku zijazo wakulima nao wakachoka na kuamua kuacha kulima kutokana na hasara wanayopata wakafikilia kufanya shughuli nyingine kutokana na kuchoshwa na changamoto wanazokutananazo  katika kilimo kwani nao wanahitaji  maisha mazuri na waliamini wangeyapata kupitia kilimo lakini imekuwa  ni tofauti.

Hata hivyo wakulima hao waliendelea  kuiomba serikali kuwakomboa kwa kuwatafutia soko la  uhakika ambalo  litawasaidia kuuza mazao yao ili wapate faida na waweze kukidhi mahitaji  ya maisha yao pamoja na kuzihudumia familia zao ambazo nazo  zinazidi kutopea katika lindi la  umasikini kutokana na wazazi wao kushindwa kuyamudu maisha kutokana na kutopata tija katika kilimo.

Mwisho